申请香港国际学校面试哭的孩子反而录取了？与你分享小经验

　　上次讲到，好多国际学校嘅面试，并非流水作业嘅你问我答，而系用「play visit」取代「interview」。将几个细路，带到有好多玩具同图书嘅环境，等佢哋自由发挥。今日想同大家分享一个面试嘅故事。

　　囡囡以前喺香港，都系读国际学校。广义而言，香港嘅国际学校，其实好多，而且各有特色。就算斋计真正攞国际学校牌嘅嗰类，都有不少选择。我有个朋友，偏爱细校，钟情family feel。所以，佢一直唔明，当年我哋点解拣大校。我话，因为面试当日，呢间学校嘅老师，令我睇到教育最纯粹嘅真身。
　　掟玩具等同面试失败？
　　当时嘅面试课室，有各种各样嘅玩具同图书。啲细路一入到去，就呢度睇下，嗰度摸下，好快就搵到自己感兴趣嘅嘢。讲真，如果唔知道系面试，我仲以爲入咗要买飞嘅playroom。欢声笑语，轻松自在。
　　话说囡囡俾一枱积木吸引，开始砌起来。砌咗一阵，老师行过去，问佢砌紧啲乜嘢。佢就好有兴致，开始介绍佢设计嘅城市，好似玩紧Minecraft一样。老师亦听得好投入，好交足戏。倾完一轮，老师随手系隔离枱，攞咗个毛公仔，问囡囡玩唔玩。佢接过个毛公仔，睇咗一眼，就闪电手咁，说时迟那时快，掟咗去旁边厨房仔嘅锌盘里面。
　　听到呢度，唔知大家点谂？反正，我之后同啲朋友讲，佢哋都笑我生咗个神射手，安慰我面试好睇彩数，唔使唔开心。仲有朋友教路，下次其他学校面试之前，俾粒糖佢嗒下，心情好啲，发挥就会好啲。

　　IB教育鼓励表达自己

　　其实，故事峰迴路转。我没唔开心，囡囡亦发挥得好好，好到amazing，起码面试老师系咁讲。我清楚记得，囡囡掟完毛公仔，老师嘅第一个反应，唔系训导主任上身，批评掟嘢唔啱，要爱惜玩具之类。相反，佢问咗一个问题：点解掟啊？囡囡话：因为唔钟意。老师听完，没话就算唔钟意，都唔应该掟，要用「um,thanks,but no thanks」来客气婉拒。
　　实情系，老师选择继续发问：点解唔钟意啊？囡囡答：觉得毛公仔个样好恶。老师听完，大赞佢有主见，有自己嘅谂法。囡囡见老师咁明白佢，笑得好开心。老师趁机补一句：公仔好似有啲痛喎，不如一齐睇下佢有没事？囡囡一听，突然觉得好对唔住个公仔，马上过去搵翻佢。老师就安慰：下次见到唔钟意嘅公仔，可以俾翻我或者放埋一边，咁公仔咪唔会痛咯。囡囡恍然大悟，即刻say yes。
　　睇到呢一幕，我当场眼湿湿。只有高手，先会识得四两拨千斤。老师之后同我分享，IB教育系inquiry-based，重视认识同表达自己。佢话囡囡够「真」，没忌讳表达自己嘅情绪。而且，佢又讲得出掟公仔嘅原因，呢个喺persuasion and influencing skills嘅体现。

　　下次，当你又有冲动想讲大道理，不如学下呢位老师，首先问清楚「点解」。教育毋须喺礼数客套面前跪低，而应该先剖析真心。动之以情，直击人心。

　　撰文:Vikey Chen